Бүгін Қазақстан мұсылмандары діни басқармасының төрағасы Наурызбай қажы Тағанұлы Мысыр Араб Республикасына сапары барысында әйгілі әл-Азһар университетінің конференц-залында осы елде білім алып жатқан қазақ студенттерімен жүздесті.

Бас мүфти білім алу мен елге қызмет етудің маңызына тоқталып, ізденуші шәкірттерге насихат айтты.

«Биыл, яғни 2024 жылды Қазақстан мұсылмандары діни басқармасы діни қызмет аясында «Ислам және дәстүр құндылығы» жылы деп атады. Осы жыл аясында қыруар жұмыстар, жобалар атқарылып жатқанын ақпарат көздерінен көріп, біліп отырсыздар. Дін мен дәстүр қазақ халқы үшін құстың қос қанаты секілді. Бірінен екіншісін ажырату қиын, мүмкін де емес. Сол себепті ұлттық дүниетанымымыздың қайнар көзі саналатын дін мен дәстүрімізге бекем болып, елге адал қызмет етуге баршаңызды шақырамын» деді ҚМДБ Төрағасы.

Кездесу барысында қасиетті Құран аяттары оқылып, Бас мүфти ел мен жердің амандығын және шәкірттерге пайдалы білім тіледі. Сондай-ақ Қазақстан мұсылмандары діни басқармасының атынан студенттерге арнайы дастарқан жайылды.