Аса қамқор, ерекше Мейірімді Алланың атымен!

Құрметті мұсылман қауым, ардақты шәкірттер!

Қасиетті Рамазан айының келуімен баршаңызды шын ықыласпен құттықтаймын. Бұл – адамның ішкі дүниесіне үңіліп, өміріне мән беріп, иман мен ізгілікті серік ететін айрықша уақыт. Рамазан әрбірімізге сабырдың қадірін, шүкірдің мәнін, мейірімнің құнын терең сезіндіреді.

Бұл ай – тек ораза ұстау емес, жүректі тазарту, ойды түзету, амалға жауапкершілікпен қарау мектебі. Күнделікті тіршілікте жақсылықты көбейтіп, сөзімізді де, ісімізді де көркем етуге мүмкіндік беретін рухани белес. Құранмен сырласып, дұғамен тыныстап, жан тыныштығын табатын берекелі шақ.

Рамазан – бауырмалдықты бекемдейтін, қоғамда жанашырлықты арттыратын қасиетті мезгіл. Бір-бірімізге қолдау көрсетіп, ізгі ниет пен игі амалға ұмтылу – осы айдың шынайы тағылымы. Әр шаңыраққа тыныштық, әр жүрекке сенім мен үміт ұяласын.

Ұлы Жаратушы баршамызға қабыл болған құлшылық, баянды береке, нық иман нәсіп етсін! Ұлттық құндылықтарымызды ұлықтап, үлкенге құрмет, кішіге ізет көрсетіп, әжелер мектебінің өнегесін ардақтай білейік. Қасиетті ай әр отбасыға шаттық пен рухани толысу әкелсін!

Жарбол Болатұлы
«Һибатулла Тарази» медресе-колледжінің директоры