Бас мүфти Наурызбай қажы Тағанұлының төрағалығымен өткен ҚМДБ Ғұламалар кеңесінің ХХXVІ мәжілісінде бірқатар жаңа пәтуалар қабылданды.

Атап айтқанда, «Көлікті көлікке айырбастау (бартер) үкімі», «Сақтандыру қызметі туралы үкім», «Меншігінде жоқ затты сатудың үкімі», «Электронды темекіні қолданудың үкімі», «Сюцай жүйесінің шариғи үкімі» пәтуаларының мәтіні бекітілді.

Басқосуда «ҚМДБ-ның діни және ұлттық құндылықтарды насихаттаудағы рөлі», «РАНТ және ЖАНТ мүшелеріне арналған тұғырнама» құжаттары мен мешіт салу тәртібі, мешіттерде намаздан (бес уақыт, жұма) кейін жамағатпен бірге атқарылатын амалдар секілді ережелердің мазмұны мақұлданды. Сондай-ақ жиында ҚМДБ-ның 2023 жылы атқаратын негізгі іс-шаралары пысықталды.

Бас мүфти Наурызбай қажы Тағанұлы Ғұламалар кеңесінің ХХXVІ мәжілісін қортындылап, кеңес жұмысына табыс тіледі.

Бүгін Қазақстан мұсылмандары діни басқармасының «әл-Фараби» залында өткен 2022 жылдың қорытынды Төралқа мәжілісінде Бас мүфти Наурызбай қажы Тағанұлының «Ислам – ынтымақ пен бірлік діні» кітабының танытымы өтті.

Қазақ қоғамына ынтымақ пен бірлікті, татулық пен қайырымдылықты насихаттап жүрген Қазақстан мұсылмандарының қара шаңырағы – мүфтият пен мешіт имамдары, барша дін қызметкерлерінің соңғы бір жылда атқарған іс-шаралары кітапқа еніп, «MUFTYAT» баспасынан жарық көрді.

«Біз жыл басындағы елдегі жағдайға байланысты 2022 жылды діни қызмет аясында «Ислам – ынтымақ пен бірлік діні» жылы деп жарияладық. Аллаға шүкір, осы бастама аясында жоспарланған бірқатар бастамалар мен іс-шаралар жүзеге асты.

«Ислам – ынтымақ пен бірлік діні» жылы аясында 400-ден астам іс-шара өткізілді. Осы шаралар келер ұрпаққа тарих болып қалсын деген ниетпен атқарылған жұмыстарымызды, жазған мақалаларымызды жинақтап, кітап етіп шығарған болатынбыз» деді Бас мүфти.

Өз кезегінде ҚМДБ Төрағасы Наурызбай қажы Тағанұлы жаңа кітапты облыс бас имамдарына табыстады. Сосын ел амандығы үшін дұға жасады. 

Елордада Қазақстан мұсылмандары діни басқармасының кеңейтілген Төралқа мәжілісі басталды.

Бас мүфти Наурызбай қажы Тағанұлының төрағалығымен өтіп жатқан 2022 жылдың қорытынды жиынына наиб мүфтилер, Діни басқарманың бөлім басшылары мен мамандары, сондай-ақ 20 өкілдіктің бас имамдары қатысуда.

Қасиетті Құран Кәрім аяттарын оқумен басталған жиында ҚМДБ Төрағасы, Бас мүфти Наурызбай қажы Тағанұлы: «Аллаға шүкір, біз осы жылды жақсы нәтижелермен қорытындылап отырмыз. Еліміз үшін түрлі сынақтарға толы өткен 2022 жылы да Қазақстан мұсылмандары діни басқармасы мен оған қарасты мешіт имамдары, барша дін қызметкерлері халықпен бірге болды. Қиналғанға қол ұшын созып, қайғырғанның мұңын бөлістік. «Ислам – ынтымақ пен бірлік жылы» аясында бірнеше конференция өткіздік. ҚМДБ жанынан республикалық Ақсақалдар кеңесі, біздің бастамамызбен Түркістанда Түркі мемлекеттерінің «Мүфтилер алқасы» құрылды. Бір жылда 77 мешіт жамағаттың игілігіне берілді. Соның ішінде мұнарасы көкпен таласып, алып күмбезі төрткүл дүниені тамсандырған елордадағы Республикалық бас мешітті ерекше атап өтуіміз керек.

Мысыр, Түркия, Сауд Арабиясы Корольдігі мен Марокко Корольдігіне жасаған ресми сапарымыз жемісті болды» деді.

Айта кетейік, бүгін кеңейтілген Төралқа мәжілісінде облыс бас имамдарының 2022 жылы атқарған жұмыстарының есебі тыңдалуда.

Ақтөбе облыстық «Нұр Ғасыр» мешітінде наиб имам, «Ақжар» қайырымдылық мекемесінің (қарилар орталығы) директоры Бекжан қари Әлденовтің шәкіртіне ижаза беру рәсімі салтанатты түрде өтті.

Айтулы шараға облыс, қала, аудан имамдары мен ҚМДБ ақсақалдар кеңесінің мүшелері, мешіт жамағаты т.б қатысты.

«Маған Нұрислам Ғабитұлы келіп Құранды басынан соңына дейін Хафс ‘ан ‘Асим риуаяты, әш-Шатыйбия жолы бойынша толық Құранды жатқа оқып берді. Алланың жәрдемімен толық оқып аяқтаған соң менен ижаза беруімді өтінді. Өз кезегінде мен оған қашан және қай жерде болмасын оқуға әрі үйретуге рұқсат беретін осы сала өкілдерінің шарттарына сай (ижаза) бердім. Сондай-ақ мен оған жоғарыда айтылған риуаятпен Құранды құрметті шейх Халид Хасан Рашид Дәруишаға оқып бергенімді жеткіздім. Ал ол кісі Алла елшісіне (оған Алланың салауаты мен сәлемі болсын) дейін жалғасатын иснәдпен өзінің екі ұстазы шейх Мұхаммед Фәһд Харуф пен шейх Мустафа Әқсауи әл-‘интәбиден ижаза алған.

Алла Тағала бұл рұқсатнаманы ынталы алғырларға жеткізсін әрі оларға көркем мінез-құлық беріп олардан қабыл алсын! Әмин!» деді шәкірттің ұстазы Бекжан қари Әлденов.

Айта кетсек, салтанатты шарада Нұрислам қари Ғабитұлына облыстық «Нұр Ғасыр» мешітінің наиб имамы Мұхаммедисмаил Шадман жамағат тарапынан сый ретінде Ұмраға жолдама табыстады. Нұрислам қари Ғабитұлы 2003 жылы дүние келген. Түркия астанасы Стамбул қаласындағы «Cennet Kur'an kursu»-ның 2019-2021 жылғы түлегі. Қазіргі таңда Ақтөбе қаласы, «Ақжар» қайырымдылық мекемесінің шәкірті. Сондай-ақ Нұрислам Қабат – Ақтөбе облысынан шыққан үшінші ижазалы қари. Діни білімін жетілдіріп, барлық қиындықты еңсеріп, жоғары дәрежеге жеткен Нұрислам қари Ғабитұлы мен ұстазы Бекжан қари Аманкелдіұлын зор табысымен құттықтаймыз. Әрдайым Алланың қолдауы болып, игі қадамына нұр жаусын!