Мақалалар

"Қаңтар оқиғасының" құрбандарына Құран бағышталды

«Қасіретті қаңтар» оқиғалары қазақ еліне сынақ болды. Әділеттің өріне, шындықтың шыңына ұмтылған мұң-наласы мол қаймана халықты қалқан етіп, залым күштер зұлым ниетін іске асыруға тырысты. Қалаларды қиратты, қарсы кездескенді жайратты, қан төкті, елді үрейге бөкті. Қазақстанымыздың бейбіт аспанын қара бұлт торлады.

Осы оқиға кезінде жазықсыз құрбан болған азаматтардың рухына арнап ҚМДБ Жамбыл облыстық "Һибатулла Тарази" мешітінде Құран оқылды.

Облыс бас имамы Бейбіт Мырзагелдиев бастаған мешіт имамдары мен медресе ұстаздары қасиетті Құран сүрелерін оқып, марқұмдардың рухына Құран сауабын бағыштады. Ел амандығы, ауызбіршілігі, тәуелсіздік тұғырының биік болын тілеп, көпшілікпен дұға жасады.

Ақерке БЕКҚҰЛОВА,

"Һибатулла Тарази" мешітінің баспасөз қызметі

БАС МҮФТИ УНИВЕРСИТЕТ АУЛАСЫНДА ҚҰРБАН ШАЛДЫ

Алматы қаласына іссапармен барған Бас мүфти Наурызбай қажы Тағанұлы Нұр-Мүбарак университеті ауласында салынып жатқан жаңа оқу ғимаратының берекелі болуы үшін құрбан шалып, дұға қылды.

ҚМДБ Төрағасы құрбан шалу рәсімінде: «Нұр-Мүбарак университеті – дін қызметкерлерін дайындап келе жатқан еліміздегі жалғыз оқу орны. Бүгінде университет түлектері еліміздің әр саласында абыройлы қызмет етіп жатыр. Оқу орнының 4 қабатты оқу ғимараты 800 студентке арнап салынған болатын. Ал бүгінде мұнда 1700 студент білім алуда. Сондықтан алдымызда жаңа оқу ғимаратын салу міндеті тұр» деді Наурызбай қажы Тағанұлы.

Бас мүфти құрбан шалып, салынып жатқан оқу ғимаратының ойдағыдай аяқталуы үшін дұға тіледі. «Уа, Алла Тағала! Оқу ордасы құрылысының ойдағыдай аяқталып, осы университеттен асыл дінімізге қызмет ететін шәкірттердің көптеп шығуын нәсіп еткейсің! Әмин!» деді ҚМДБ Төрағасы.

Айта кетейік, құрбан шалу рәсіміне Нұр-Мүбарак университетінің проректоры Қайрат Құрманбаев, наиб мүфти Кенжеәлі Қоңыратбайұлы, Алматы қаласының бас имамы Төлеби Оспан, сондай-ақ ҚМДБ Ғұламалар кеңесінің мүшелері қатысты.

Жамбыл облысының дін мамандары үздік атанды

Қазақстан мұсылмандары діни басқармасының қорытынды Төралқа мәжілісі барысында «Мүфтият үздігі – 2022» номинациясымен марапаттау рәсімі өтті. Салтанатты шараға Бас мүфти Наурызбай қажы Тағанұлы арнайы қатысып, номинация иегерлерін марапаттады.

Аталған шарада Жамбыл облысы "Һибатулла Тарази" мешітінің наиб имамы Нұралы Бақытұлы «Жыл уағызшысы-2022», ал "Кеңесхан қажы" мешітінің ұстазы, Phd доктор Зейнеп Үсенова «Үздік ұстаз-2022» марапатын иеленді.

Өңірімізден қос бірдей дін маманың еңбегі еленіп, ел игілігі үшін жасаған жұмысының жемісі көрініп жатқанына баршамыз шын қуаныштымыз. Алла ұстаздарымызға береке мен разылығын жаудырсын!

Ақерке БЕКҚҰЛОВА

"Һибатулла Тарази" мешітінің баспасөз қызметі

ҒҰЛАМАЛАР КЕҢЕСІНДЕ ЖАҢА ПӘТУАЛАР ҚАБЫЛДАНДЫ

Бас мүфти Наурызбай қажы Тағанұлының төрағалығымен өткен ҚМДБ Ғұламалар кеңесінің ХХXVІ мәжілісінде бірқатар жаңа пәтуалар қабылданды.

Атап айтқанда, «Көлікті көлікке айырбастау (бартер) үкімі», «Сақтандыру қызметі туралы үкім», «Меншігінде жоқ затты сатудың үкімі», «Электронды темекіні қолданудың үкімі», «Сюцай жүйесінің шариғи үкімі» пәтуаларының мәтіні бекітілді.

Басқосуда «ҚМДБ-ның діни және ұлттық құндылықтарды насихаттаудағы рөлі», «РАНТ және ЖАНТ мүшелеріне арналған тұғырнама» құжаттары мен мешіт салу тәртібі, мешіттерде намаздан (бес уақыт, жұма) кейін жамағатпен бірге атқарылатын амалдар секілді ережелердің мазмұны мақұлданды. Сондай-ақ жиында ҚМДБ-ның 2023 жылы атқаратын негізгі іс-шаралары пысықталды.

Бас мүфти Наурызбай қажы Тағанұлы Ғұламалар кеңесінің ХХXVІ мәжілісін қортындылап, кеңес жұмысына табыс тіледі.

«ИСЛАМ – ЫНТЫМАҚ ПЕН БІРЛІК ДІНІ» КІТАБЫ ЖАРЫҚ КӨРДІ

Бүгін Қазақстан мұсылмандары діни басқармасының «әл-Фараби» залында өткен 2022 жылдың қорытынды Төралқа мәжілісінде Бас мүфти Наурызбай қажы Тағанұлының «Ислам – ынтымақ пен бірлік діні» кітабының танытымы өтті.

Қазақ қоғамына ынтымақ пен бірлікті, татулық пен қайырымдылықты насихаттап жүрген Қазақстан мұсылмандарының қара шаңырағы – мүфтият пен мешіт имамдары, барша дін қызметкерлерінің соңғы бір жылда атқарған іс-шаралары кітапқа еніп, «MUFTYAT» баспасынан жарық көрді.

«Біз жыл басындағы елдегі жағдайға байланысты 2022 жылды діни қызмет аясында «Ислам – ынтымақ пен бірлік діні» жылы деп жарияладық. Аллаға шүкір, осы бастама аясында жоспарланған бірқатар бастамалар мен іс-шаралар жүзеге асты.

«Ислам – ынтымақ пен бірлік діні» жылы аясында 400-ден астам іс-шара өткізілді. Осы шаралар келер ұрпаққа тарих болып қалсын деген ниетпен атқарылған жұмыстарымызды, жазған мақалаларымызды жинақтап, кітап етіп шығарған болатынбыз» деді Бас мүфти.

Өз кезегінде ҚМДБ Төрағасы Наурызбай қажы Тағанұлы жаңа кітапты облыс бас имамдарына табыстады. Сосын ел амандығы үшін дұға жасады.