Рамазан айы тұсында облыстық "Һибатулла Тарази" мешітінде ерекше жағдайлар орын алды. Мешітке келген бірнеше өзге дін ұстанушы, әрі өзге ұлт өкілдері ислам дінін қабылдады.

Рамазан айына бірер күн бұрын бірінен соң бірі келіп, мұсылмандыққа өткісі келетін ниеттерін білдірген оқиғаны ғибрат болсын деп оқырманмен бөлісуді жөн көрдік. 

Анна есімді келіншек өз туған күнінде мешітке аяқ басып, мұсылман болғысы келетінін жеткізді. Келіншекпен "Һибатулла Тарази" медресе-колледжінің ұстазы Азамат Әбдірахманов тілдесіп, кәлима-шахадат айтқызды. Исламның негізгі парыздарын түсіндіріп, сұрақтарына жауап берді. Анна өзіне жаңа Айша есімін алды. Және бұл жағдаймен әлеуметтік желідегі парақшасында бөлісіп, "Мен жаңадан өмірге келдім" деп жазба қалдырыпты. 

Анна Астана қаласына барған сапарында бас мешітке кіріп, аралаған екен. Мұсылмандықтың көркем көрінісі толғандырып, келіншектің айтуынша, сол сәтте Алла жүрегіне иман нұрын сеуіп, хидаят берген-ді. Мешітте тұрып Анна "Таразға оралсам, міндеті түрде исламды қабылдаймын" деп өзіне серт беріпті. 

Исламның хақ дін екенін сезінген Руслан Әмиржанов, Тимурлан Сергейович, Руслан Серікқалиұлы сынды азаматтар да дінді қабылдады. 

Руслан Серікқалиұлы шешесі орыс, әкесі қазақ. Алайда бала кезінде шешесінің діні христиандықпен тәрбиелеп, нағашы апасы шіркеуге апарып шоқындырған екен. Ер жетіп, иманды ортаға тап болған Руслан Алласын тауып, мұсылмандықты қабылдады. 

"Қасымдағы жүрген достарым мұсылмандар, көпшілігі намаз оқиды. Олардың иманжүзділігіне қатты қызықтым. Сонан соң ислам жайлы ақпарат, білім жинай бастадым. Өзім орыс тілді болсам да, қасымдағы бауырларым әртүрлі: әзірбайжан, түрік, қазақ, өзбек ұлттарынан болған намазхандар. Түр-әлпетім осы жердің тумасына ұқсағанымен, дінім бөлек еді. Жақсы ортаның себебімен исламды тани алдым. Солайша, өз қалауыммен, жан жүрегіммен мұсылман болғым келді. Осы ниетпен міне, мешітке келдім" - дейді Руслан. 

«Алла Тағала өзінің кеңшілігімен қалағанына һидаят береді және (өзінің кеңшілігімен) қалағанын (күнәлардан, адасудан) қорғап-қорғаштайды" - дейді Имам Тахауи. Түрлі ағым мен жалған діндер көбейген уақытта қараңғыдағы шам-шырақ хақ ислам дінін табу пенденің маңдайына жазылған бақ десек орынды. 

Мұсылман атанған бауырларымыз үшін шын жүректен қуанышымызды білдіреміз. 

Ақерке БЕКҚҰЛОВА

Тараз шаһарына іс-сапармен келген ҚМДБ Төрағасының орынбасары, наиб мүфти Кенжеәлі Қоңыратбайұлы asyldin.kz  студиясын аралады.

ҚМДБ-ның Жамбыл облысы бойынша бас имамы Бейбіт Әліпбекұлы мешіттің баспасөз хатшысы, журналист Ақерке Шахризатқызын таныстырып, студияда жүргізіліп жатқан жұмыстарды тілге тиек етті. 

Сонымен қатар ҚМДБ-ның төл арнасы - "Мұнара" ТВ үшін осы студияда, мешітте және "Дін мен дәстүр" мұражайында бірнеше бағдарламалар түсіріліп келе жатқанын, әрі экранда жарық көргенін жеткізді. 

"Һибатулла Тарази" мешітінің баспасөз қызметі