Жаңалықтар

"Көне түркі тілдерінің тағылымы" атты семинар өтті

Бүгін қасиетті Рамазан айының алғашқы күнінде Жамбыл облыстық "Һибатулла Тарази" мешітінде "Көне түркі тілдерінің тағылымы" атты семинар өтті. Атаулы шарада ҚМДБ Төрағасының орынбасары, наиб мүфти Кенжеәлі Қоңыратбайұлы баяндама жасады.

Жиынға Тараз қаласына қарасты барлық мешіттердің имамдары, Байзақ, Жамбыл аудандарының бас имамдары, "Һибатулла-Тарази" медресе-колледжінің студенттері қатысты. ҚМДБ-ның Жамбыл облысы бойынша бас имамы Бейбіт Әліпбекұлы өңірдегі дін мамандарын наиб мүфтиге таныстырып, көне түркі, шағатай тілдерін меңгерген имам, медресенің білікті ұстазы Ғалымбек Жапектің осы бағытта шәкірттерге дәріс беріп жатқанын атап өтті.

Кенжеәлі Қоңыратбайұлы көне түркі, шағатай тіліндегі еңбектердің құндылығы және оларды түп нұсқадан оқудың маңыздылығын тілге тиек етті. Сонымен қатар имамның тұлғалық келбеті, әдебі, өзін-өзі ұстауы, әлеуметтік желідегі жұмысы туралы сөз етті.

Семинар соңында дін қызметіне Алладан қуат сұрап, имамдардың ісіне береке тіледі.

Ақерке БЕКҚҰЛОВА

"Һибатулла Тарази" мешітінің баспасөз қызметі

МЕМЛЕКЕТ БАСШЫСЫ РАМАЗАН АЙЫМЕН ҚҰТТЫҚТАДЫ

ҚР Президенті Қасым-Жомарт Тоқаев Қазақ елін күллі мұсылман қауымының сағына күтетін мерекесі Рамазан айымен құттықтады. Мемлекет басшысының құттықтауын Ақорданың ресми сайты жариялады.

«Сіздерді қасиетті Рамазан айының басталуымен шын жүректен құттықтаймын! Бұл – күллі мұсылман қауымы үшін мән-маңызы айрықша мезгіл.

Адамзатты рухани тазаруға және жан-жақты кемелденуге бастайтын осы айда төзімділік, жанашырлық, имандылық сияқты құндылықтар кеңінен дәріптеледі.

Ата-бабамыз Рамазанды «он екі айдың сұлтаны» деп ардақтаған. Ораза ұстаған жамағатқа ауызашар беріп, бір-біріне ерекше құрмет көрсеткен. Салт-дәстүрімізбен сабақтас асыл дініміз ғасырлар бойы Ұлы далада елдің бірлігін және қоғамның тыныштығын сақтау жолында маңызды рөл атқарып келеді.

Мейірімділік айында халқымыз игі істерін еселеп, сауапқа кенеле берсін! Баршаңызға зор денсаулық, бақ-береке тілеймін! Ораза қабыл болсын!» делінген Президент құттықтауында.

Жамбыл: Имамдар арасында кіші футболдан жарыс өтті

Жамбыл ауданы орталық «Бәйдібек» мешіті мен аудандық Спорт кешенінің бірігіп ұйымдастыруымен ұлыстың ұлы күні 22-наурыз мерекесіне орай, Жамбыл облысының имам, ұстаздары арасында кіші футболдан ашық турнир өтті. Атап айтар болсақ, Тараз қаласынан екі команда, Байзақ, Жуалы, Жамбыл аудандарынан командалар қатысты.

Жүрделі орындарды: 1 орын - Тараз 1 командасы, 2 орынды – Тараз 2 командасы, 3 орынды – Жамбыл ауданы командасы иеленді. Ашық турнирде орын алған командалар кубок, медальдар мен қаржылай сыйлықтар тапсырылды. Атсалысқан демеушілерге, ауыл имамдарына облыстың бас имамы Бейбіт Мырзагелдиев өз алғысын білдірді.

Кіші футболдан Жамбыл облысының бес аудан арасында ауыспалы кубокты облыстың бас имамы Байзақ ауданының бас имамы Қанат Жұмағұлға табыстады. Ендігі кезекте, Байзақ ауданы командасы турнир ұйымдастыру кезегін алды.

Жамбыл аудандық мешітінің баспасөз қызметі

Алғашқы тарауық намазы оқылды

Ел-жұрт сағына күткен ораза айы сауаптардың сарқылмас теңізі. Аталған қасиетті Рамазан айының құрметіне Тараз шаһарының мешіттерінде күнделікті 20 рәкаттан тұратын тарауық намазы басталады. Осы айдың кіруімен облыстық "Һибатулла Тарази" мешітінде бүгін биылғы алғашқы тарауық намазы оқылды.

ҚМДБ-ның Жамбыл облысы бойынша бас имамы Бейбіт Мырзагелдиев "тарауық" намазы жайлы тілге тиек етіп, Рамазан айының қасиетін сөз етті. Халықты айтулы мерекемен құттықтап, жылы лебізін білдірді. Жиналған жамағат мешітке лық толды. Бас имам құптан намазынан соң көпшілікте тарауық намазында Құран хатымын түсіретін қариларды таныстырып өтті.

Алла қасиетті айдың сауабынан құр қалмай берекелі, ықыласты өткізуді нәсіп етсін. Алла қасиетті Рамазан айын барша жамағатқа сауапты, әрі берекелі қылғай.

Айта кетейік, облыстық мешіттегі тарауық намазын Әлімұхаммед Егізбаев пен Бірлік Амангелді есімді қарилар жүргізуде.

Ақерке БЕКҚҰЛОВА,

"Һибатулла Тарази" мешітінің баспасөз қызметі.

Рамазан қарсаңында Құранды толықтай жаттап қари атанды

Бүгін исі мұсылман асыға күткен Рамазан айы келіп, тарауық намазы басталды. Осынау қасиетті күнге тұспа-тұс келіп, "Һибатулла Тарази" мешіті жанынан ашылған "Қарилар" курсының шәкірті Алланың кәләмі Құран Кәрімді толықтай жаттап бітті.

ҚМДБ-ның Жамбыл облысы бойынша бас имамы Бейбіт Әліпбекұлы құптан намазы уақытында жас қариды таныстырып, сертификат табыстады.

Қари атанған Маханбеталиев Амирхан Досмырзаұлы 2019-2023 жылдар аралығында Құранды толықтай жаттап шықты. Талапты жастың әкесіне және ұстазына бас имам алғыс айтып, қарилардың қатары көбейе берсін деп жылы лебізін білдірді. Ақсақалдар батасын беріп, жас қариға Алланың разылығын тіледі.

Ақерке БЕКҚҰЛОВА

"Һибатулла Тарази" мешітінің баспасөз қызметі