«Һибатулла Тарази» мешітінде Жамбыл өңірінің аудан және қала имамдары мен наиб имамдары қатысқан алқалы бас қосу өтті.

Жиында қасиетті Құран Кәрім аяттары оқылып, имамдар Түркиядағы қайғылы оқиғадан қаза тапқан жандардың рухына сауабын бағыштап, бауырлас елдің амандығы үшін дұға жасады.

Қазақстан мұсылмандары діни басқармасының 2023 жылға арналған жылдық жоспарын талқылау, биылғы жоспарды пысықтау мақсатында өткен шарада ҚМДБ-ның Жамбыл облысы бойынша бас имамы Бейбіт Мырзагелдиев сөз сөйлеп, имамдық қызметтің маңыздылығын тілге тиек етті.

Жамбыл облысының бас имамы Бейбіт Мырзагелдиев Масаншы ауылында орналасқан «Қордай Құран Қарилар дайындау» орталығында болып қайтты.

Бас имам орталықтың ұстаздары және шәкірттермен кездесіп, студенттердің білім деңейін тексерді. Білім ордасының күй-жайымен танысып, құжаттар, сабақ жоспары, үлгерім жайында ақпарат алды. Сонымен қатар өткізілуге тиісті іс-шаралар бойынша ұстаздарға тапсырма берді.

Бейбіт Әліпбекұлы шәкірттермен жүздесуде Құран жаттауы, орталықтағы жағдайлары жайлы тілдесіп, сұқбаттасты.

Жақында Қазақстан мұсылмандары діни басқармасының төрағасы, Бас мүфти Наурызбай қажы Тағанұлы төралқа мәжілісінде еліміздегі имамдар мен медресе қызметкерлеріне өзінің бағдарлық баяндамасын жолдап, бірқатар бастамаларды жариялады.

Бас мүфти төралқа мәжілісінде Діни басқарма осы жылы бес бағыт бойынша жұмыстарға басымдық беретінін айтты. Бірінші бағыт дін мен дәстүр, екінші бағыт ізгі қоғам, үшінші бағыт ихсан және насихат, төртінші бағыт діни оқу-ағарту, бесінші бағыт жат діни ағымдардан сақтандыру.

Бас мүфти Наурызбай қажы Тағанұлының бастамасымен бүгінде Діни басқарманың діни білім және кадр даярлау жұмыстарына баса көңіл бөліп келеді. Имамдардың білімі мен біліктілігін көтеру бүгінгі заманның өзекті мәселесінің бірі екені белгілі. Білімді діни кадр даярлау үшін ең алдымен медресе шәкірттеріне жан-жақты білім беріп, олардың толыққанды білім алуына аса көңіл бөлу қажет. Өйткені, қазіргі заман заманауи білім беру жүйесін ұдайы жетілдіруді, дін қызметкерлерінің білімін ұдайы шыңдап отыруды қажет етуде.