Жаңалықтар

Жамбыл өңірінің имамдары жылдық есеп тапсырды

Бүгін ҚМДБ-ның Жамбыл облысындағы өкілдігі, орталық "Һибатулла Тарази" мешітінде өңір имамдарының жылды қорытындылау жиналысы өтті.

Облыс бас имамы Бейбіт Мырзагелдиевтың басшылығымен өткен шарада қала-аудан бас имамдары жылдық есеп тапсырды. Жиынға Жамбыл облысы әкімдігінің Дін істері басқармасының басшысы Сәкен Сәрсенбайұлы мен облыстық мешіттің қызметкерлері қатысты.

Бейбіт Әліпбекұлы имамдық қызметтің маңыздылығы, міндеті мен мақсаты, жауапкершілігі жайлы жалынды сөздерімен мәжілісті ашты.

Имамдар ҚМДБ бекіткен 7 бағыт бойынша жыл бойы атқарылған жұмыстардың есебін беріп, слайд, кітапша ұсынып, баяндама жасады.

Сәкен Сәрсенбайұлы имамдарға қызметтері үшін алғыс айтып, өз ұсынысын білдірді. Ал мешіт қызметкерлері өздері жауапты бағыттар бойынша аудан мешіттері жұмысының үздік және әлсіз тұстарын атап, басымдық беріп, жұмыс жасауға қажетті тұстарын атады.

Жиын соңынан әр бағыт бойынша үздік өңірлер марапатталды. Атап айтсақ, "Уағыз-насихат" бойынша Қордай ауданы, "Діни оңалту" бағыты бойынша Тараз қаласы, "Зекет және қайырымдылық" бағытынан Меркі ауданы, "Ақпарат және ағарту" бойынша Шу ауданы, "Дін мен дәстүр" бағыты бойынша Жамбыл ауданы үздік деп танылды.

Барлық дін мамандарына алғыс айтылып, алдағы жылда да дін үшін, халық үшін игі істерге мұрындық болып, белсенділіктен таймай қызмет ету насихатталды.

Ақерке БЕКҚҰЛОВА

"Һибатулла Тарази" мешітінің баспасөз қызметі

Облыстық мешітте әйелдер жамағаты Мәуліт кешін өткізді

Облыстық "Һибатулла Тарази" мешітінде ҚМДБ Жамбыл облысы бойынша Әйел-қыздар секторының ұйымдастыруымен үлкен көлемде Мәуліт кеші ұйымдастырылды.

Астанада «Медресе темір адамы» спорттық сайысы өтті Елордасы Астана қаласындағы «Қазақстан» спорт кешенінде «Медресе темір адамы» республикалық медресеаралық спорттық сайысы өтті.

ҚМДБ елорда өкілдігі мен «Астана» медресе-колледжінің ұйымдастыруымен өткен додалы жарысқа еліміздегі Діни басқармаға қарасты тоғыз медресе және «Хусамуддин ас-Сығанақи» институының шәкірттері қатысты. Сайыстың ашылу салтанатында ҚМДБ Діни білім және кадр даярлау бөлімінің меңгерушісі Смайыл Сейтбеков алғысөз сөйлеп, қатысушыларға Бас мүфти Наурызбай қажы Тағанұлының сәлемін жеткізді. Сайыскерлерге сәттілік тілеп, спортпен айналысу, дене шынықтыру мен салауатты өмір салтын ұстанудың маңызын тілге тиек етті.

Сайысқа келсек, қатысушылар екі номинация бойынша бақ сынасты. Эстафета номинациясы бойынша 100 метр қашықтыққа суға жүзуден «Сарыағаш» медресе-колледжінің шәкірті Даниял Ерланұлы жеңімпаз атанса, «Үшқоңыр» медресе-колледжінің шәкірті Рахым Құрманбек 2-орынды және «Орал» медресесе-колледжінің шәкірті Пана Бейбітұлы 3-орынды иеленді. Эстафета номинациясы бойынша 400 метр қашықтыққа жүгіруден 1-орынды «Үшқоңыр» медресе-колледжінің шәкірті Ниятдин Абдиссаламов жеңп алса, «Һибаттула Тарази» шәкірті Әбдісаттар Русланұлы 2-орынды, ал 3-орынды «Әбу Ханифа» медресе-колледжінің шәкірті Жалғас Орынбасарұлы місе тұтты.

Карантиндік шектеулерден кейінгі алғашқы ауызашар жасалды

Биыл карантиндік шектеулерден соң қайта орталық "Һибатулла Тарази" мешіт-медресесінде ауызашар беріліп бастады. Көпшілікпен берекелі дастарханда, дұға жасап, бірге ауыз ашуды сағынысып қалған жамағат ауызбіршіліктің нышанын көрсетуде.

Пандемия уақытында ауызашарлар онлайн ұйымдастырылып, үйді-үйге жеткізілетін. 2 жылдық үзілістен соң көпшілікті бір дастархан басына жинаған ауызашарға орталық мешіттің бірінші наиб имамы Нұралы Бақытұлы мен "Һибатулла Тарази" медресе-колледжінің директоры Сакен Сейдикаримов қатысып, "Рамазанның қадір-қасиеті жайлы" уағыз-насихат айтты. Ауызашардан соң игі жандардың көмегімен 100 адамға Рамазан қоржыны таратылды.

Көпшілік "Ас адамның арқауы, тарауих оның тарқауы" деген нақыл сөзге ақыл түріп, жиын соңында ауызашар беруші жандарға алғыстарын білдіріп, құран бағыштап, бір сапқа тарауық намазына тұрды.

Ақерке БЕКҚҰЛОВА

"Һибатулла Тарази" мешітінің баспасөз қызметі

Медресе-колледж шәкірттері республикалық олимпиададан жүлделі оралды

Ақтөбе медресе-колледжінде араб тілі мен фиқһ пәнінен медресеаралық республикалық олимпиада өтті. 2 курс пен 3 курс студенттерінің арасында жасалған білім додасына "Һибатулла Тарази" медресе-колледжінің 3 курс студенттері Е.Сержан мен А.Атабек, 2 курстан А. Уали мен Ержанбек Мадияр медресе сенімін арқалап аттанған болатын.

Араб тілінен болған сайыста Е. Мадияр ұстаздар үмітін ақтап, 2-орынды иеленді. Жол басшылық танытып барған З.Нұрсұлтан ұстаз жарыстың мән-жайымен танысып, көзбен көріп қайтты. Ұстаз жарыстың жоғарғы деңгейде ұйымдастырылғанын, әрі қонақ жайлылығына тәнті болып қайтқанын жеткізді.

Жарыстан келген студенттерді медресе басшысы Сакен Сейдикаримов қабылдап, жарыстың жүйесі мен барысын сұрап, шәкірттерге ұстаздар тарапынан алғысын білдірді. Ал ілім жолында жүрген шәкірттерге Қ.Жолдыбайұлының "Кемел адам" кітабы мен "Қари болғым келеді" кітабын сыйға тартты.

Жиын соңында естелікке суретке түсіп, орын алған шәкірттің ата-анасына қоңырау шалып, ұлдарының жеңісімен құттықтады. Обылыс имамы Бейбіт Мырзагелдиевке арнайы амандаса кірген шәкірттер, батасын алды.

"Һибатулла Тарази" медресе-колледжінің баспасөз қызметі