Жаңалықтар

МЕМЛЕКЕТ БАСШЫСЫ РАМАЗАН АЙЫМЕН ҚҰТТЫҚТАДЫ

ҚР Президенті Қасым-Жомарт Тоқаев Қазақ елін күллі мұсылман қауымының сағына күтетін мерекесі Рамазан айымен құттықтады. Мемлекет басшысының құттықтауын Ақорданың ресми сайты жариялады.

«Сіздерді қасиетті Рамазан айының басталуымен шын жүректен құттықтаймын! Бұл – күллі мұсылман қауымы үшін мән-маңызы айрықша мезгіл.

Адамзатты рухани тазаруға және жан-жақты кемелденуге бастайтын осы айда төзімділік, жанашырлық, имандылық сияқты құндылықтар кеңінен дәріптеледі.

Ата-бабамыз Рамазанды «он екі айдың сұлтаны» деп ардақтаған. Ораза ұстаған жамағатқа ауызашар беріп, бір-біріне ерекше құрмет көрсеткен. Салт-дәстүрімізбен сабақтас асыл дініміз ғасырлар бойы Ұлы далада елдің бірлігін және қоғамның тыныштығын сақтау жолында маңызды рөл атқарып келеді.

Мейірімділік айында халқымыз игі істерін еселеп, сауапқа кенеле берсін! Баршаңызға зор денсаулық, бақ-береке тілеймін! Ораза қабыл болсын!» делінген Президент құттықтауында.

Жамбыл: Имамдар арасында кіші футболдан жарыс өтті

Жамбыл ауданы орталық «Бәйдібек» мешіті мен аудандық Спорт кешенінің бірігіп ұйымдастыруымен ұлыстың ұлы күні 22-наурыз мерекесіне орай, Жамбыл облысының имам, ұстаздары арасында кіші футболдан ашық турнир өтті. Атап айтар болсақ, Тараз қаласынан екі команда, Байзақ, Жуалы, Жамбыл аудандарынан командалар қатысты.

Жүрделі орындарды: 1 орын - Тараз 1 командасы, 2 орынды – Тараз 2 командасы, 3 орынды – Жамбыл ауданы командасы иеленді. Ашық турнирде орын алған командалар кубок, медальдар мен қаржылай сыйлықтар тапсырылды. Атсалысқан демеушілерге, ауыл имамдарына облыстың бас имамы Бейбіт Мырзагелдиев өз алғысын білдірді.

Кіші футболдан Жамбыл облысының бес аудан арасында ауыспалы кубокты облыстың бас имамы Байзақ ауданының бас имамы Қанат Жұмағұлға табыстады. Ендігі кезекте, Байзақ ауданы командасы турнир ұйымдастыру кезегін алды.

Жамбыл аудандық мешітінің баспасөз қызметі

Алғашқы тарауық намазы оқылды

Ел-жұрт сағына күткен ораза айы сауаптардың сарқылмас теңізі. Аталған қасиетті Рамазан айының құрметіне Тараз шаһарының мешіттерінде күнделікті 20 рәкаттан тұратын тарауық намазы басталады. Осы айдың кіруімен облыстық "Һибатулла Тарази" мешітінде бүгін биылғы алғашқы тарауық намазы оқылды.

ҚМДБ-ның Жамбыл облысы бойынша бас имамы Бейбіт Мырзагелдиев "тарауық" намазы жайлы тілге тиек етіп, Рамазан айының қасиетін сөз етті. Халықты айтулы мерекемен құттықтап, жылы лебізін білдірді. Жиналған жамағат мешітке лық толды. Бас имам құптан намазынан соң көпшілікте тарауық намазында Құран хатымын түсіретін қариларды таныстырып өтті.

Алла қасиетті айдың сауабынан құр қалмай берекелі, ықыласты өткізуді нәсіп етсін. Алла қасиетті Рамазан айын барша жамағатқа сауапты, әрі берекелі қылғай.

Айта кетейік, облыстық мешіттегі тарауық намазын Әлімұхаммед Егізбаев пен Бірлік Амангелді есімді қарилар жүргізуде.

Ақерке БЕКҚҰЛОВА,

"Һибатулла Тарази" мешітінің баспасөз қызметі.

Рамазан қарсаңында Құранды толықтай жаттап қари атанды

Бүгін исі мұсылман асыға күткен Рамазан айы келіп, тарауық намазы басталды. Осынау қасиетті күнге тұспа-тұс келіп, "Һибатулла Тарази" мешіті жанынан ашылған "Қарилар" курсының шәкірті Алланың кәләмі Құран Кәрімді толықтай жаттап бітті.

ҚМДБ-ның Жамбыл облысы бойынша бас имамы Бейбіт Әліпбекұлы құптан намазы уақытында жас қариды таныстырып, сертификат табыстады.

Қари атанған Маханбеталиев Амирхан Досмырзаұлы 2019-2023 жылдар аралығында Құранды толықтай жаттап шықты. Талапты жастың әкесіне және ұстазына бас имам алғыс айтып, қарилардың қатары көбейе берсін деп жылы лебізін білдірді. Ақсақалдар батасын беріп, жас қариға Алланың разылығын тіледі.

Ақерке БЕКҚҰЛОВА

"Һибатулла Тарази" мешітінің баспасөз қызметі

РАМАЗАН – РУХАНИ КЕМЕЛДЕНУ АЙЫ

Наурызбай қажы ТАҒАНҰЛЫ,

ҚМДБ Төрағасы, Бас мүфти

Қадірлі отандастар!

Сіздерді исі мұсылман баласы асыға күтетін, он екі айдың сұлтаны болған қасиетті Рамазан айының келуімен шын жүректен құттықтаймын! Әр шаңыраққа бірлік пен береке, бақыт пен шаттық тілеймін! Рамазан айы құтты болсын!

Алла Тағала қасиетті Құранда: «Уа, иман келтіргендер! Өздеріңе дейінгі қауымдарға парыз етілгендей тақуалыққа жетулерің үшін сендерге де ораза ұстау парыз етілді» («Бақара» сүресі, 183-аят) деп баяндайды. Шариғатымыз бойынша балиғатқа толған, ақыл-есі дұрыс әрбір мұсылманға Рамазан айында ораза ұстау – парыз. Алайда жолаушылар, науқас жандар мен сырқаты асқынып кетуінен қауіптенген адамдар, сондай-ақ жүкті немесе емізулі баласы бар әйелдер ораза ұстауды кейінге қалдыруына болады. Бұған шариғатымыз рұқсат береді.

Рамазан айының қадірі мен қасиетін терең түсінген ізгілер оразаға алты ай қалған сәттен бастап: «Раббымыз, бізді Рамазан айына аман-есен жеткізе гөр!» – деп дұға жасаған. Сан ғасырдан бері Ислам дінін рухани тірегі еткен халқымыз берекелі Рамазан айын ерекше дайындықпен күтеді. Сауаптар еселеніп жазылатын айда ауызашар беріп, көмекке мұқтаж жандарға пітір садақасын үлестіріп, үлкендердің алғысы мен батасын алуға тырысады. Оразада игі ниетпен орындалатын ізгі амалдар бүгінде салт-дәстүрімізге айналып, ұрпақтан-ұрпаққа жалғасып келеді.

Рамазан – Алла Тағаланың мұсылмандарға берген ұлы сыйы, нығметі. Қасиеті мен шарапаты мол айда күнәларымыздан арылып, сауап жинауға, жан-дүниемізді тазартуға тырысқан абзал. Ардақты Пайғамбарымыз Мұхаммед (оған Алланың салауаты мен сәлемі болсын) өз үмбетін: «Бұл айда жәннат есіктері ашылады. Ораза тұтқан адамның алдыңғы және кейінгі күнәлары кешіріледі», – деп сүйіншілеген.

Рамазанда ауыз бекіткен исі мұсылман баласы өзін ішіп-жеуден ғана шектемей, жаны мен тәнін жамандықтан сақтап, ізгілікке ұмтылады. Іс-әрекетін мұсылманға тән әдеп аясында орындауға тырысады. Өйткені Рамазан – кез келген ізгі амалды риясыз ниетпен жасауға тәрбиелейтін, адамды тақуалыққа үйрететін ай.

Рухани кемелдену айы – Рамазанда барынша әдепсіз әрекет пен қате-кемшіліктен арылуды көздеген адам әдеп білмес жандардың дөрекі әрекеттерін кешіріп, сыпайы түрде «мен оразамын» деп кешірім жолын ұстанады. Кісінің кемшілігіне сабыр ету де – үлкен сауап. Алла Тағала «Шура» сүресінің 43-аятында: «Әрине кім сабыр етіп, кешірімді болса, дау жоқ, істердің ең маңыздысы осы», – деген.

Аштық пен шөлге төзіп, Алла разылығын алуды шынайы ниет еткен адамға берілетін сый мен құрмет ерекше болмақ. Алла Тағала құдси хадисте: «Аузы берік адам ішіп-жеуін Мен үшін доғарды. Ораза – Мен және құлымның арасындағы ғибадат. Оған берілетін сыйды Мен ғана өлшеп, Мен беремін. Аузы берік құлымның аштық пен шөлдеу себебінен шыққан ауыз иісі Мен үшін миск әтірінен де қайырлы», – деген.

Рамазан – Раббымыздың мейірім-махаббатына бөленетін ай. Берекелі, сауабы мол айда Алланың мейіріміне бөленіп, әрбір ізгі амалымыздың жақсылығы еселеніп жазылғай! Еліміз аман, жеріміз тыныш, тәуелсіздігіміз баянды болғай! Жаратушы Жаббар Иеміз келер жылғы ораза айына аман-есен жетуімізді нәсіп еткей! Әмин!