Жаңалықтар

Облыстық мешіттің қызметкерлері Айша бибідегі жаңа ғимаратпен танысты

ҚМДБ-ның Жамбыл облысы бойынша өкілдігі Жамбыл ауданы "Айша бибі" ауылында діни білім саласына қызмет ететін арнайы ғимарат тұрғызып жатыр.

Ғимаратты қыз-келіншектерге діни білім беру, қарилыққа оқыту бойынша "Һибатулла Тарази" мешітіне қарасты арнайы бөлім етіп іске қосу жоспарда бар.

Аталған игі істің құрылыс жұмыстарын бақылап қайту үшін облыстық мешіт-медресенің барлық қызметкерлері Айша бибі ауылына арнайы келіп, болашақ білім ордасын аралап, танысып қайтты.

Облыс бас имамы Бейбіт Мырзагелдиев қызметкерлерге ғимараттың атқаратын қызметін, толық аяқталғанда енетін көрінісін сипаттады. Көпшілік осындай елге пайдасы тиетін игі бастамаға өте қуанышты екенін жасырмады. Дін қызметкерлерінің ғимаратты көруге арнайы келгендігі де осының дәлелі.

Ақерке БЕКҚҰЛОВА

"Һибатулла Тарази" мешітінің баспасөз қызметі

Қордай: Жамағат білім сайысында бақ сынады

Білім инемен құдық қазғандай. Адам өмірінің соңына дейін білім алады, ал кейде тіпті оның өзі аз болады. Адам қаншалықты білімді болса, соншалықты бай-қуатты болады. Адамның білімсіз өткен бір күні бос күні. Батыл бірді жықса, білімді мыңды жығады. Білім адам бойына біткен ең мықты қару. Адамзаттың жетер ең биік шыңы білімді толық меңгерген күні.

Білім – құндылық, білім – жүйе, білім – үрдіс, білім – нәтиже, демекші аудандық Қордай мешітінде жамағат арасында білім сайысы өтті. Сайыс сұрақтары Құран, фиқһ, ақида, ислам тарихы, сахабалар ғұмыры, әдеп-ахлақ тұрғысында қойылды.

Жамағаттың білімін, біліктілігін, бірлігін арттыру мақсатында ұйымдастырылған шараға ауданның бас имамы Асқар Зәкіржанұлы қатысып, білім сайысында сынға түскендерді бағалады.

Жүзден жүйрік шыққан жүлдегерлерге қаржылай сыйлықтар табысталды.

Қордай аудандық мешітінің баспасөз қызметі

ЕРЕЖЕП – БЕРЕКЕЛІ АЙ

Ережеп – берекелі һәм ұлық ай. Бұл айда игі амалдарға мол сауап жазылады, құлшылықтар мен дұғалар қабыл болады. Алла Елшісі (оған Алланың салауаты мен сәлемі болсын): «Бес түн бар, онда дұғалар кері қайтарылмайды. Олар – Ережеп айының алғашқы түні, Шағбан айының жартысындағы түн, Жұма түні, Ораза және Құрбан айт түндері», – деген.

Ережеп (Ражаб) – Алла Тағаланың соғысуға, қан төгуге тыйым салған (Зұлқағда, Зұлхижжа, Мұхаррам, Ражаб) айларының бірі. «Ражаб» сөзі ұлықтау, құрметтеу деген мағынаны білдіреді.

Кейбір деректерде жер жүзін су басқанда Нұх пайғамбар кемеге Ережеп айының бірінші күні мінген, Мұхаммед пайғамбарға (оған Алланың салауаты мен сәлемі болсын) ең алғашқы уахи Ережеп айында түскен, осы айда Исра және Миғраж оқиғасы болған деген мәліметтер айтылады. Тағы бір деректе «Ережеп – ол суы сүттен ақ, балдан тәтті және мұздан салқын бір жұмақ өзенінің аты және бұл мөлдір бұлақтан тек осы айда ораза ұстағандар ғана ішеді» делінген.

Пайғамбарымыз (оған Алланың салауаты мен сәлемі болсын) Ережеп айында ораза тұтқан. Алайда бұл айда ораза тұту немесе тұтпау – әркімнің өз еркі.

Ислам діні келместен бұрын Ережеп айында құрбан шалу рәсімі бар еді. Ислам келіп, оның үкімін жойды. Бір кісі Пайғамбарымызға (оған Алланың салауаты мен сәлемі болсын) : «Біз жаһилиятта (надандық дәуірде) Ережеп айында (осы айдың құрметіне) құрбан шалатын едік. Енді бізге не бұйырасыз?» – деді. Пайғамбарымыз (оған Алланың салауаты мен сәлемі болсын): «Алланың жолында қайсы айда болса да құрбандықтарыңды шала беріңдер. Алла үшін жақсылық жасаңдар. Тамақтандырыңдар», – деді.

Шариғат бойынша жағдайы бар мұсылманға Құрбан айт күні құрбан шалу – уәжіп (міндет), ал басқа уақыттарда ол нәпіл ғибадат болып есептеледі.

Алла Елшісі (оған Алланың салауаты мен сәлемі болсын) Ережеп айында көп истиғфар айтуға (кешірім тілеуге) үндеген. Ардақты Пайғамбарымыз Мұхаммед (оған Алланың салауаты мен сәлемі болсын) Ережеп айы басталғанда: «Уа, Алла! Ережеп және Шағбан айларында бізге береке бер, бізді Рамазан айына жеткізе гөр!» – деп дұға еткен.

Ғалымдардың бірі: «Ережеп – желге, Шағбан – бұлтқа, Рамазан жаңбырға ұқсайды. Ережеп айында дән егілмесе, Шағбан айында суарылмаса, Рамазан айында одан қандай егін күтуге болады» деген екен. Сол себепті, бұл айды барынша пайдалы өткізіп, ғибадат жасап, дұға етіп, араздасқандар бір-бірімен жарасып, татуласу керек.

Алла Тағала баршамызға Ережеп айының игілігі мен берекесін нәсіп етсін! Еліміз аман, жұртымыз тыныш, тәуелсіздігіміз баянды болғай. Әмин!

Тараз қалалық "Әулие ата" мешітіне жаңа бас имам тағайындалды

Бүгін күндердің сұлтаны жұмада Тараз қалалық "Әулие ата" мешітіне жаңа бас имамды тағайындау үшін ҚМДБ-ның Жамбыл облысы бойынша бас имамы Бейбіт Мырзагелдиев арнайы барды.

Облыс бас имамы жұма уағызын айтып, сонымен қатар мешітке бас имам қызметіне келген Ержан Аманбаевты жамағатпен таныстырды.

Айта кетейік, Ержан Аманбаев бұл уақытқа дейін облыстық "Һибатулла Тарази" мешітінде наиб имам болып қызмет атқарған. Сондай-ақ өңірдегі қажылық, зекет және қайырымдылық, жастар ісі секторы, Уақып қоры, Ихсан сынды бағыттар бойынша белсенді қызмет атқарған белікті маман.

Бейбіт Әліпбекұлы Ержан Маханұлының жетістіктері мен білімін тілге тиек етіп, ісіне сәттілік тіледі.

Мешіт ақсақалдары батасын беріп, қуаныштарын жеткізді.

Ақерке БЕКҚҰЛОВА

"Һибатулла Тарази" мешітінің баспасөз қызметі

ТОРҒАЙДА ҚАЙЫРЫМДЫЛЫҚ МЕКЕМЕСІ АШЫЛДЫ

Қостанай облысының Жангелдин ауданына қарасты Торғай ауылында Ғазиз Әмірханов атындағы қарилар медресесі ашылды.

Қайырымдылық мекемесінің ашылуына Бас мүфти кеңесшісі Кенжетай Дүйсенбай мен Жангелдин ауданының әкімі Шота Сәбитбекұлы арнайы қатысып, құттықтау сөз сөйледі. Кенжетай Байкемелұлы ауыл тұрғындарын құттықтай келе, Бас мүфтидің сәлемін жеткізіп, 100 Құран Кәрім мен «Әліппе және Таджуид ережелері» кітаптарын қайырымдылық мекемесіне сыйға тарты.

Сондай-ақ салтанатты шарада дін қайраткері, аудандық мешіттің негізін қалаған Ғазиз қажы жайлы жылы естеліктер айтылды. Ашылу салтанатына жиналған қонақтар қайырымдылық мекемесін аралап көрді.