Жаңалықтар

Қари атанған шәкіртке ұмра қажылығына жолдама берілді

Жамбыл облыстық "Һибатулла Тарази" мешітінен ашылған Құран қарилары курсы тағы бір түлекті қари етіп шығарды. Ашылған 1 жылдың ішінде әсте 2 түлек үздік бітіріп шықты.

Айтулы шараға орай күндердің сұлтаны қасиетті жұмада ҚМДБ-ның Жамбыл облысындағы бас имамы Бейбіт Мырзагелдиев жамағатқа қарилықта оқып жатқан шәкірттерді таныстырып, алғашқы түлекті де тілге ерекше тиек етті.

Сонымен қатар бүгінде қари атанған Ермек Мыңболовқа жомарт демеушілердің атынан ұмра қажылығына арналған жолдаманы тарту етті. Айта керейік, Ермек Мыңболов қасиетті Құран Кәрімді түгелдей 1 жылда жаттап шықты. 1999 жылғы азамат әрі "Һибатулла Тарази" медресе-колледжінің түлегі. Құран қарилар курсында қазіргі уақытта 23 шәкірт білім алуда.

Имам қариға екі дүниенің бақытын тілеп, көпшілік бірге дұға жасады. Бас имам мен ұстазы Бірлік Амангелді қариға арнайы сертификат табыстап, қуаныштарын жеткізді.

Ақерке БЕКҚҰЛОВА

"Һибатулла Тарази" мешітінің баспасөз қызметі

Жамбыл: Бас имам қари шәкірттермен сұхбаттасты

Жамбыл облысының бас имамы Бейбіт Мырзагелдиев Масаншы ауылында орналасқан «Қордай Құран Қарилар дайындау» орталығында болып қайтты.

Бас имам орталықтың ұстаздары және шәкірттермен кездесіп, студенттердің білім деңейін тексерді. Білім ордасының күй-жайымен танысып, құжаттар, сабақ жоспары, үлгерім жайында ақпарат алды. Сонымен қатар өткізілуге тиісті іс-шаралар бойынша ұстаздарға тапсырма берді.

Бейбіт Әліпбекұлы шәкірттермен жүздесуде Құран жаттауы, орталықтағы жағдайлары жайлы тілдесіп, сұқбаттасты.

МЕДРЕСЕ ЖҰМЫСЫНА ҮЛКЕН ҚОЛДАУ

Жақында Қазақстан мұсылмандары діни басқармасының төрағасы, Бас мүфти Наурызбай қажы Тағанұлы төралқа мәжілісінде еліміздегі имамдар мен медресе қызметкерлеріне өзінің бағдарлық баяндамасын жолдап, бірқатар бастамаларды жариялады.

Бас мүфти төралқа мәжілісінде Діни басқарма осы жылы бес бағыт бойынша жұмыстарға басымдық беретінін айтты. Бірінші бағыт дін мен дәстүр, екінші бағыт ізгі қоғам, үшінші бағыт ихсан және насихат, төртінші бағыт діни оқу-ағарту, бесінші бағыт жат діни ағымдардан сақтандыру.

Бас мүфти Наурызбай қажы Тағанұлының бастамасымен бүгінде Діни басқарманың діни білім және кадр даярлау жұмыстарына баса көңіл бөліп келеді. Имамдардың білімі мен біліктілігін көтеру бүгінгі заманның өзекті мәселесінің бірі екені белгілі. Білімді діни кадр даярлау үшін ең алдымен медресе шәкірттеріне жан-жақты білім беріп, олардың толыққанды білім алуына аса көңіл бөлу қажет. Өйткені, қазіргі заман заманауи білім беру жүйесін ұдайы жетілдіруді, дін қызметкерлерінің білімін ұдайы шыңдап отыруды қажет етуде.

ҚМДБ-НЫҢ «ЖІБЕК ЖОЛЫ» ҚАУЫМДАСТЫҒЫНА ҚАТЫСТЫ МӘЛІМДЕСІ

Қазақстан мұсылмандары діни басқармасы 2021 жылы қазан айында «Жібек Жолы» қайырымдылық мекемелер қауымдастығы заңды тұлғалар бірлестігінің өтінішіне сәйкес екі жақты өзара әрекеттесу мен ынтымақтастық туралы келісім жасаған болатын. Келісім аясында «Жібек Жолы» қайырымдылық мекемелер қауымдастығына қарасты қайырымдылық мекемелеріндегі тәрбиеленушілер Діни басқармаға қарасты мешіттер жанындағы діни сауат ашу курстарына қатысуға, имандылық тәрбие алуға уағдаласты.

Келісім бойынша Қауымдастыққа қарасты мекемелерде діни дәрістер мен діни насихат жұмыстарына рұқсат берілген жоқ. Алайда бұқаралық ақпарат құралдары мен әлеуметтік желілердегі хабарламада Қайырымдылық мекемелерінде діни дәрістер берілгені анықталуда. Мұндай әрекет екі жақты келісімге қайшы. Келісімді жүзеге асыру барысында тараптардың бірі талаптарды өрескел бұзатын болса, абыройы мен беделіне нұқсан келтіретін жағдайда келісім мерзімінен бұрын бір жақты тоқтатылады.

Осыған орай, Діни басқарма «Жібек Жолы» қайырымдылық мекемелер қауымдастығымен жасалған келісімді тоқтатқанын мәлімдейді.

БАС МҮФТИ 2023 ЖЫЛДЫ «ИСЛАМ ЖӘНЕ ІЗГІ ҚОҒАМ» ЖЫЛЫ ДЕП ЖАРИЯЛАДЫ (ФОТО)

Бүгін елордада өтіп жатқан Қазақстан мұсылмандары діни басқармасының кеңейтілген Төралқа мәжілісінде Бас мүфти Наурызбай қажы Тағанұлы дін қызметкерлеріне бағдарлық баяндамасын жолдап, 2023 жылды «Ислам және ізгі қоғам» жылы деп жариялады.

«Біздің халық алдындағы басты міндетіміз – жұртымызды жақсылыққа үндеп, жамандықтан тосу, ізгі қоғам құруға қадам жасау. Осы жыл аясында қоғам игілігіне арналған бірқатар іс-шараларды атқару міндеті тұр. Біз үшін қоғамның тұрақтылығы мен қауіпсіздігі маңызды. Сондықтан дін қызметкерлері мұсылман қауымының бірлігін нығайтып, берекелі, ізгі қоғам орнатуға ықпал етуі тиіс» деді ҚМДБ Төрағасы.

Сондай-ақ Бас мүфти Наурызбай қажы Тағанұлы БАҚ өкілдеріне арнайы сұхбат берді.

Айта кетейік, Төралқа мәжілісіне Діни басқарма қызметкерлері, облыстардың бас имамдары, медресе-колледж директорлары, имам-ұстаздар қатысуда.